يا هلا و مرحبا و مسهلا

يالله انك تحييهم و تبقيهم

وش اخباركم؟ طيبين ان شاء الله؟ عسى تنامون زين؟ و بطونكم عساها ما توجعكم؟

انا بطني يوجعن ذابحني الجوع و خلص الاندومي اللي عندنا>> ترا محد سألتس
طيب سكتنا خلاص

بعد الترحيب نخش في الموزوع

تذكرون ايام الروضه؟ انا هذيك الايام ما انساها ابد لاني مصرقعتن فيها بلاوي زرقا

بس اشوا اقول السالوفات اللي ابي و الي ما ابي محدن له امل يدري!

اييييييييييييه يا زمن. يوم كنت البس مريولي و اربط عنقوصتي نخله فوق راسي و اتغيصب الحليب و اروح الروضه

متحمسه ما غير احسب متى يجي وقت الاركان
و عيني على الساعه>> ما كانت تعرف تقرا الساعه
بس تعرف شلون يصير شكلها اذا جا وقت الاركان و لا تدري كم بقى >> قطعت قلب نفسها!!

و كل هالحماس على الاركان عشان العب بركن العائله
و اصير الام>> كل ذا عشان تدخل المطبخ
و تقلي باذنجان ما كان عندهم الا باذنجان بلاستيك العيال سرقوا البطاطس و قاموا يلعبون فيها كوره

و اقعد بركن العائله ربع ساعه اقلب بذالباذنجانه اللي من اول يوم لاخر يوم عيت تستوي

و كانت الروضه حقتنا كل ولد يجلس جنبه بنت و يمسك يدها في الطابور و تصير صقيقته و قصه حوب و بيعرسون و كلش

كان جنبي واحد اسمه تركي و من الجهه الثانيه عبدالعزيز

عبدالعزيز دايم يلعب معي و يلاحقني بس كنت معطيته بلوك>> امها تقول لها الثقل زين

و كان عصل تسنه مسواك و قصير و شين و ما دخل مزاجي

و في يوم ما قدر يتحمل اكثر و صارحني بحبه تحت الزوحليقه

بس قلت له ارجوك لا تحرجني>> ايه هين قمتي تضحكين تسنك خبله>> و انتي تحسبين نفسك ايش يختي؟

و اعترفت له اني احب تركي و اني ما ارضى اخونه >> مخلصه من يوم يومها..

و مسيكين انصدم بعدين قال: ههههههه كنت امزح ما احبك صدق >> حاول يرقعها بس الحوب مبين في عيونه!

كل ما تذكرت هالموقف دموعي اربع اربع راحمته>> الا دموعتس اربع اربع ذابحتس الحسوفه طلع ولد تجار و انتي ضيعيته من زينتس انتي و نخلتس احمدي ربتس انه حبتس!

و كنت مضيعتن زهره شبابي و ربيع عمري مع تركي ... يا حسافه حبي فيك يا تركي ليتني ما عرفتك و لا عطيتك قليبي اللي وقتها كان تسنه فرواله من صغره و انت غفصته في يدك لين غدا عصير>> منفعله و جوعانه لا تشرهون!

اييييييييييييييييييه وش اقو لكم عن تركي وش اخلي؟

تركي كان اطخم يوم انه بزر بس ما ظنيته تسذا للحين

كان عربجي >> هي ما طيحها الا عربجته

كان اول ما يدخل الصباح يدور له واحدن من ذالبزران يطب في بطنه و يمسح فيه البلاط بعدين يكمل يومه الدراسي مرتاح

و كان دايم يطب في بطن عبدالعزيز مسيكين ما غير اصابات و بطنه يوجعه و كل يوم يستفرغ و انتو بكرامه

و كانت فيه اطباع شينه الله مير يهديه بس وش نسوي الألب و ما يريد!

بقولكم كيف وقعت في حب تركي على راسي و محدن سمى علي!

كنت في يوم من الايام جالستن جنبه ابري قلمي لين غدا طول اصبعي عاد اصبعي وقتها كان قصير موب من طوله

و هو مدري وش يسوي الظاهر انه ينغف...

و انا شفته و انصدمت و لفيت وجهي لجهه عبدالعزيز و انا اكمل ابري القلم>> ياذا القلم اللي عيا ينبري..

و يوم خلصت و اقوم اروح للمعلمه ابيها تربط نخلتي لانها خربت>> يعني اذا زينتيها بيزين شكلتس؟

و يوم رجعت و ما القى قلمي على الطاوله. طبعا على طول التفت لتركي لانه معروف دايم يسرق اغراض خلق ربي

و انا ما ودي احارشه داريتن انه عربجي و بيسطرني

سالت بكل ذوق: تركي شفت قلمي؟

هو يتثاوب فاق خشته: جا اخذه نواف...

و انصدم صدمه عمري.. الحين لي ساعه ابري القلم و يجي نواف ياخذه بارد مبرد... لا يمكن

و اروح لنواف و انا اتنافض لانه هو العربجي الثاني بعد تركي و لان امي قالت لي يا ويلتس تضيعين اغراضتس ترا بكتب للمعلمه انتس مهمله و كلش تضيعينه

و انا موتي تدري المعلمه عن شي شين فيني كنت ابي اصير الطالبه المثاليه عشان اوزع الدفاتر>> وش استفدتي من توزيع الدفاتر تكفين الا هم و شقى و غثا و ذالبزران يطلعون اوشاعات انتس ما عطيتيهم دفاترهم..

و رحت لنواف و انا طاقتني ام الركب لاني وقتها كنت ضعيفه شخصيه و ما اعرف اخذ حقي و لا شي

قلت له و انا ارقل: نواف.. معليش ترجع قلمي؟

هو ما لقاني فيس تسني احاتسي سيسان و رحت نغزته في كتفه ابيه يطالعني>> يا شين البزران اذا قاموا ينغزون!

و يوم نغزته و قام فجاتن من غير مقدمات و دفني لين كمخت بالجدار اللي وراي يحسب النغز ضرب>> يا حسافه النخله اللي توهم مزينينها!

و صك راسي بالجدار و من يومها و انا منيب طبيعيه ما غير مخي فاصل.

و اشغل الونانات و اقعد اصايح باعلى صوتي

وااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا ااااء

و المعلمه كانت تسولف مع معلمه الفصل الثاني و حاطتن بنت ثقيله طينه هي المراقبه و تعلمها اذا صار شي. و البنت ما تبي تخسر سمعتها انها تعرف تراقب فانثبرت و خلتني ابتسي لين انقطع حلقي.

و بينما انا منهمكتون في الصياح و الشهاق و مسح السعابيل الا يجي تركي و بدون مقدمات يضحي بحياته و يكفخ نواف

قام نواف و عطى تركي بوكس>> هذه القصه واقعيه يرجى للي قلوبهم رهيفه و ما غير يدوخون عدم القراءه

بس تركي ما همه و نزل جلد في نواف و انا اطالع فاقتن خشتي من الروعه وصلت للقبو اللي تحتنا و سعابيلي تقوطر

و ما قام تركي الا يوم قام نواف يبتسي و يوم قضى من مصارعته راح لطاوله نواف و اخذ القلم و رجع لي اياه من غير و لا كلمه>> اروح وطي مع الفزعه يا ريتشارد مخ العنز!

انا اخذته و انا لسه فاقتن حشتي>> سكري ذالخشه مالت عليتس و على اللي يتطاق عشانتس!

و طبعا لازم استعراض البزران راح تركي و كل الفصل واقف يطالعه و قال لنواف اللي دموعه اربع اربع و ماسكن بطنه: يا ويلك لو طقيتها مره ثانيه و الله اذبحك.. تراها صديقتي.. ابوي يقول مو رجال اللي يضرب بنات..

وقالها من هنا و انا رحت سليق من هنا مع الفارس المغوار و تعلق قلبي و مهجتي و عيوني قامت ترف..

مير اول مرتن اعرف اني صقيقته كنت احسبنا بس جيران

و صار تركي فتى الاحلام و رمز الرجوله و حب الحياه و اغلى على تسبدي من كبسه شغالتنا>> امها هونت تطبخ منذو مبطي!

و صرت ما اغيب ابدن ابدن و اروح كل يوم عشان اشوف تركي

و صار صقيقي مرتن بالحيل و دخلني في شله العيال حقته. و كل يوم نروح نسرق شي من بزر>> هذي اللعبه حقتهم!

و صرت اذا تهاوش مع بزر اروح اركض له اتاكد ان ما فيه اصابات و قلت لامي تحط لي لزاقات و بلاسترات عشان اذا انجرحت و انا الصدز مخبيتهم لتركي ما غير ادور جروح و الزق في كل مكان>> ما يطهرون الجرح و لا يغسلونه ما غير شغل مطرسه

و كان دايم ياخذ اقلامي ومساحاتي و لا يرجعها بس ما همني كلش يهون لعيونه تفداه مقلمتي و صاحبتها> بلاتس خبله.

و يوم زكم قعدت جنبه عشان يعديني و ازكم زيه ما ابيه يعاني لحاله>> اتحداكم شفتو حوب مثل تسذا!

و صارحني بحبه هو الثاني تحت المرجيحه ( رومانصي و الله ما يلعب!)

و اعترفت له انا بعد بحبي و انا خدودي شابتن ضو و اغمز بعيوني

و اتفقنا نعرس اذا صار عمرنا 10 سنين عشان تركي يمديه يجمع فلوس من المصروف و نشتري لنا بيت جنب بيتزا هت >> ما تبي تسكن مع الحموله !

بس كان في شي منكد علينا حبنا

وهو ان تركي ما يقعد معي ما غير في كرسي العقاب و محروم من الفسحه لانه ما يحل واجباته و يكفخ في خلق ربي!

قلت يا بنت مالتس الا حل واحد

و صرت كل يوم قبل ما ارجع البيت اخذ دفاتر تركي و كتبه معي بيتنا و اذا خلصت حل واجباتي امسك واجباته و احلهم له


و هو يقول لامه ان المعلمه قالت خلوا دفاتركم بالمترسه

و انا اوزي كتبه في أي قرنه قبل ما تجي امي و تفتح شنطتي
و تكتشف اني قاعدتن احل لولد الناس>> اذا اشتهيتي صرتي
داهيه و اذا ما اشتهيتي صرتي كمخه!

و يعلم ربي اني كنت اهتم بواجباته اكثر من واجباتي و الون له احلى من تلويني و اذا سمعت المعلمه تمدحه انبسط اكثر من انها تمدحني >> السحالي اذا وقعوا في الحوب يصير فيهم تسذا!

بس للاسف ما ينفع فيهم هالتماسيح

في قايلتن من القوايل كان عندنا فسحه ثانيه. و كالعاده انا قاعدتن في حضن تركي الا شوي.

و يوم طلعت الساندوتش حقي تلاقطت عيونه و قال: وشو هذا؟

انا بكل حب و حنان و اسبل بعيوني قلت: نوتيلا... تبي؟

توني بقسم له الا هجم على حقي و اخذه كله. و بدا يبلع >> الطريق الى قلب الرجل معدته.

و انثبرت و قلت يفداه ما يخالف اهم شي هو مبسوط..

و يوم خلص و ياكل الساندوتش حقه هو بعد لا فكر يقسم لي>> كان الساندوتش حقه بيض يعني ما ودي يقسم لي بس و ولو المفروض يراعي الاتوكيت >> توه لاهف حقتس وينه وين الاتوكيت؟؟

و انا انطميت و اكتفيت بشرب عصير البردقان حقي>> زين ما شفطه بعد كثر خيره..

و ارجع بيتنا و اروح لشغالتنا و اقول لها بكرا حطي لي ساندوتشين 2 ناويه واحدن لي و واحدن لتركي >> يا حظ رجلها فيها!

و يوم جا باتسر متحمسه ابي الفسحه تجي عشان اوري تركي كيف انه منجطل في معاليق قلبي و اني جبت له ساندوتش.

و من يوم ما جت الفسحه التفت و عطاني نظره تهديد و قام ينافخ: وش جبتي اليوم؟>> مناصر نظريه ما ينفع مع السحالي الا العين الحمرا!

انا بابتسامتون عذبه: خذ تركي جبت لك واحد هذا نوتيلا...

بس الشفاحه ذابحته اخذه و طل في اللنش بوكس حقي>> اللنش بوكس حقها صندوق معدن مرسومن عليه باربي لابستن لبس قليل حيا اللهم يا كافي..

و يوم شاف ان فيه واحدن ثاني و اخذهم كلهم و لا جاب خبري. انا انهبلت وش اكل طيب؟ مو مقعول كل يوم عصير بردقان

قلت له: تركي انا واحد و انت واحد...

هو بدى يطفح الاول ما عنده مشاكل: انا 2 و انتي و لا شي..

انا: طيب انت 1 و نص و انا نص...

هو: قلت انا 2 و انتي و لا شي... ترا بطقك في وقت اللعب اذا قلتي للمعلمه...

و تخنقن العبره و تطقن الغلقه مير اني احب النوتيلا لو هو جبن ما يخالف بس قويه 2 نوتيلا..

و انا اطالعه اشوا ما غص وهو يالك و يوم خلص الاثنين مسك ابو بيض حقه و طالعه شوي و بعدين قال: تدرين... شبعت خلاص خذي هذا.. تبين بيض بكاتشب؟؟>> بدري يا خوي... عسى ما كلفت على عمرك بس؟؟

و انا منيب احب البيض و لا الكاتشب . و لو هو واحدن ثاني اللي ماخذه كان قلت لتركي يحروله بس اذا هو اللي سارقه وش اسوي؟

و اشرب عصير بردقان مرتن ثانيه و انا ماكلتن تراب....

و انتهى الحوب رسميا يوم مسكني وقت اللعب و انفرد فيني بزاويه و جلدني صدق..>> وين الي ابوه يقول مو رجال اللي يضرب بنات و لا اذا نفضه الجوع ما يخالف؟

و انا اصيح و احلف اني ما قلت للمعلمه و هو يقول انا اطقك عشان ما تفكرين تقولين للمعلمه>> تماسيح اخر زمن!

و خلاني و انا ميتتن صياح و الخشم يصب لا عادت على ذالنوتيلا..

و يوم رجعت الفصل و انا اشاهق رحت له و قلت له: ترى ما راح اتزوجك خلاص>> فسخ الخطوبه
هو قال: احسن.. بتزوج روان...

و انهبل، روان هذي عدوتي و منيب اطيقها في عيشه الله.. كذا يا تركي؟ كذا تسوي فيني؟ كذا ما همك فراقي و تعرس على عدوتي عشان تقهرن؟!

و ازعل و ابرطم طول اليوم و مير تسني لزقه قاعدتن جنبه ما درى عني.

و يوم جينا نطلع ما اخذت كتبه و دفاتره..و يوم جا ثاني يوم جلدني مرتن اوخرى لاني ما اخذتهم.. و صرت اخذهم كل يوم لما خلصت السنه و انا اكتب و الون و اخاف اغلط لا يوريني الشغل.

و طول اجازه الصيف و انا ادعي ربي ما يصير معي تركي في التمهيدي عشان ما يجلدني لاني ما عدت حمل مصايب اكتر من كده

و الحمدلله ربي استجاب دعائي و ما صار معي صار في الفصل اللي جنبي و قبل ما اطلع اقعد ساعه اطلطل اتاكد انه موب في الممر لا يجي بعد يطب في بطني و لا يمعط شوشتي انا و هالنخله اللي 4 سنين ما غيرت التسريحه!

بس وقتها خلاص ما عاد يفيد الندم و لا الدموع و لا ابو ريالين و لا شي

ضيعت عبدالعزيز من بين يديني

و تركي لا عادت على الساعه اللي عرفته فيها

و يا تركي ان كانك تقرا هذي القصه تراني ما احللتك و ساندوتشاتي باخذهم منك عاجلا او آجلا..

و هونت معد صرت ابيك و لا اطيقك و تسن عندي انك غديت شيفه و روان تراها اعرست على واحدن ثاني موت من القهر>> ترا بيجي يلعن خيرتس الحين!


و هذي اخره حب التماسيح ما يقدرون الوفا و الاخلاص و حسافه فيهم مشاعرنا المخلصه!

صدق من قال يا مآمن للرقاله يا مآمن للميه في الغربال.

ما يستفاد من السالوفه:

1_لا تعلم اللي جنبتس وش انتس تاكل و ان لزم قله ساندوتش بيض بكاتشب بيهون عنتس و بيروح

2_لا تروحين للمعلمه تربط نخلتس ترى هذي سبب المشكله كل ابوها. و لا لا تسوين نخله يكون احسن و مير حتى شكلتس بيزين!

3_لا تسلمين قلبتس لتمساح موب يستاهلون قلوب هذول تسنهم بعارين اكبر همهم بطونهم.

4- ان صار التمساح عربجي لا تخقين معه، ترا ان كفخ غيرتس يعني بيكفختس انتي الثانيه.

5- خلتس مع الشين الضعيف ترا هو اللي بيصير ولد التجار و عليه الكلام اما اذا جاتس اطخم طخيمان وخري عنه موب نافعتس.

و بس خلصت السالوفه و اتمنى اشوف ردودكم و تفاعلكم

سلاااااااااااااااااااام